ممبئی: جماعت اسلامی ہند مہاراشٹر کے امیر مولانا الیاس خان فلاحی نے ریاست میں نفرت انگیز جرائم کے خلاف فوری کارروائی اور متاثرین کے لیے فوری انصاف کا مطالبہ کیا ہے۔
میڈیا سے بات کرتے ہوئے مولانا الیاس خان فلاحی نے کہا، "فلن بری تحصیل، چھترپتی سمبھاجی نگر میں نذیر خان کا بے رحمی سے قتل اور سلطان شیخ پر حملہ، اور اسی طرح دھولیہ-سی ایس ایم ٹی ایکسپریس میں 72 سالہ حاجی اشرف منیار پر ہونے والا خوفناک حملہ، ہم اس کی شدید مذمت کرتے ہیں۔ یہ نفرت انگیز جرائم، جو کہ فرقہ وارانہ نفرت سے تحریک یافتہ ہیں، مہاراشٹر میں ایک مخصوص کمیونٹی کے خلاف بڑھتے ہوئے تشدد کی واضح یاد دلاتے ہیں۔ اس وقت مسلم معاشرہ خوف اور غصے میں ہے اور مجرموں کے خلاف فوری کارروائی اور متاثرین کے لیے فوری انصاف کا مطالبہ کرتا ہے تاکہ مزید تقسیم کو روکا جا سکے۔ ایسی کھلی بربریت کے موقع پر ریاستی حکام کی خاموشی تشویشناک ہے۔ ان نفرت انگیز جرائم میں ملوث گرفتار افراد کے خلاف قانونی کارروائی کی جانی چاہیے اور ایف آئی آر میں ان کے جرائم کی سنگینی کو مناسب طریقے سے درج کیا جانا چاہیے، جس میں ضروری سمجھا جائے تو اقدامِ قتل کے الزامات بھی شامل ہونے چاہیے۔
حکومت کو چاہیے کہ وہ تمام شہریوں کی حفاظت کے لیے ٹھوس اقدامات کرے، چاہے ان کا مذہب کچھ بھی ہو، اور عدلیہ پر معاشرے کا اعتماد دوبارہ بحال کرے۔”
جماعت اسلامی ہند مہاراشٹر کے امیر نے کہا، "یہ واقعات الگ تھلگ نہیں ہیں؛ یہ فرقہ وارانہ بدامنی کے ایک تشویشناک نمونے کا حصہ ہیں، جو نفرت انگیز تقاریر اور سوشل میڈیا کے غلط استعمال کی وجہ سے پیدا ہوئے ہیں۔ ریاست میں ماحول خراب ہو رہا ہے کیونکہ فرقہ وارانہ نفرت کا بے قابو پھیلاؤ ہو رہا ہے، جسے سیاسی جماعتوں کے آئی ٹی سیل کے ذریعے تقسیم کرنے کی کوشش کی جا رہی ہے۔ اگر اس مسئلے کو فوری طور پر حل نہیں کیا گیا تو مہاراشٹر کو قانون اور امن و امان کی سنگین صورتحال کا سامنا کرنا پڑ سکتا ہے۔ ہندوستان کی سپریم کورٹ کی ہدایت کے مطابق نفرت انگیز تقاریر کے خلاف از خود نوٹس لے کر کارروائی کی جانی چاہیے، اور اگر پولیس اس میں ہچکچاہٹ کا مظاہرہ کرتی ہے، تو اسے عدالت کی توہین سمجھا جانا چاہیے۔ ہم حکومت اور پولیس سے اپیل کرتے ہیں کہ وہ فرقہ وارانہ اور سماج دشمن عناصر کے خلاف پوری طاقت کے ساتھ کارروائی کریں۔ ان منافرت پھیلانے والے عناصر کو روکا جانا چاہیے، اس سے پہلے کہ وہ ریاست کی سماجی اور مذہبی یکجہتی کو مزید نقصان پہنچائیں۔”
مولانا الیاس خان نے کہا، "ہم ریاست کے تمام انصاف پسند شہریوں سے اس تشدد کے خلاف آواز اٹھانے اور متاثرین کے ساتھ یکجہتی کا مظاہرہ کرنے کی اپیل کرتے ہیں۔ ہم مسلم معاشرے سے اپیل کرتے ہیں کہ وہ صبر و تحمل کا مظاہرہ کریں اور انہیں اشتعال دلانے اور تقسیم کرنے کی کوشش کرنے والوں کے جال میں نہ پھنسیں۔ موجودہ صورتحال نہ صرف فرقہ وارانہ ہم آہنگی کو خطرے میں ڈالتی ہے بلکہ مہاراشٹر کی اقتصادی ترقی کے لیے بھی ایک بڑا خطرہ پیدا کرتی ہے، کیونکہ طویل عرصے تک جاری رہنے والی بدامنی سرمایہ کاری کو روک سکتی ہے اور ریاست کی ساکھ کو نقصان پہنچا سکتی ہے۔ ریاست میں دوبارہ امن و امان قائم کرنے کے لیے اجتماعی کوششوں کی ضرورت ہے۔ حکومت اور قانون نافذ کرنے والے اداروں کو فوری کارروائی کرنی چاہیئے۔
